Dagbók ritarans

Ég átti erindi í Efstaleitið í liðnum mánuði vegna Útsvarsþátttöku okkar Steins. Þar hitti ég Þorkel Gunnar íþróttafréttamann og fór vel á með okkur. Hann var fullur áhuga á að fjalla meira um hlaup og skyldar greinar og það gekk eftir í gær þegar hann hringdi og boðaði komu að Árbæjarlaug til að fjalla um Powerade-hlaupið. Ég ætlaði ekki að hlaupa en hafði gert ráð fyrir að mæta og hvetja mitt fólk í Skokkhóp Garðabæjar.
Veðrið í gærkvöldi lék við okkur, logn og þægilegur hiti og í hópi 353 hlaupara voru nokkrir í stuttum og bol. Frábær stemmning myndaðist við markið því þar voru nokkrir krakkar í reiðileysi og einboðið að benda þeim á að mynda klapp-og hróplið. Þau stóðu sig svo vel í því að Pétur formaður lofaði þeim Poweradeflösku ef þau myndu hvetja alla í mark. Það gerðu þau svikalaust og skemmtu sér konunglega.
Útsendarar RÚV mættu og tóku myndir fyrir hlaup og Bibba lóðsaði tökumanninn upp að brú til að mynda fyrstu menn á leið niður brekkuna. Síðan voru viðtöl við fyrsta karl og konu og fréttamaður hringdi rúmlega níu til að fá tíma á fyrstu mönnum. Afraksturinn mátti sjá í tíufréttunum. http://http.0.muli.rs.ruv.is/video.ruv.is/4498196$1.wmv
Þetta kom vel út og voru menn afar ánægðir með þessa heimsókn RÚV-ara.